【人生慶幸得一旅伴，陪我癲住四圍走】
有次小月同成班朋友去旅行，因為執到個限量袋開心得滯，
行落樓梯嗰陣唔小心扭親隻右腳，樂極生悲。
睇完當地醫生（活用 google translate），雖然唔算嚴重，
但行路始終係拐下拐下，不宜多行。為咗唔影響其他人，
唯有主動放棄第二日嘅樂園行程，自己留喺 hostel 休息。
第二朝起床，望望時間，正路所有人都已經出哂發。
感到寂寞之際，一齊去嘅好友 sze 竟然出現喺佢面前。
「點解嘅？」小月吳若希式咁問。
「驚喜可？諗諗下我都係決定留喺到睇住妳。」sze 回應。
「睇住我？傻架…妳去啦，我記得妳都期待咗好耐架？」
「要去幾時都有得去啦，過山車無妳坐喺旁邊瘋狂大嗌邊好玩架？」
「唓，唔知邊個玩跳樓機嗰陣係要死捉住我隻手呢？」小月反擊。
「邊個買衫次次都要我落手決定…」
「明明講緊第二樣嘢！」
「哈哈…」
事情發展，唔係呢件事成為契機改變咗佢地乜嘢。
呢件事發生之前，佢地本身已經係一對好姐妹加好旅伴。
曾經聽過一句說話，搵一個好嘅旅伴可能比搵一個伴侶更難。
其實無錯，人大咗，要相約一班朋友去旅行本身已經唔易，
要搵一個喺旅程入面同自己步伐最貼近嘅人就更加難。
你遲起身？佢願意等。
訓唔著？你地總有傾唔完嘅話題。
你有難頂嘅地方？佢大概都有，但你地會互相體諒。
突然間有想轉行程？佢聽完一笑，原來佢都想去。
互相照應已經係常識，完全唔洗專登去要求。
就算真係有詏撬，唔洗幾分鐘又會開始傾一陣應該食乜。
如果身邊有一個咁嘅旅伴，好好珍惜，即刻問下佢下次去邊到啦。
又或者，你地早已經計劃好。
-----------------------------------------------------------------------------------
FB: 有心 無默
IG: https://instagram.com/echoofheart/
Search